सेयर बजारमा अनशनको प्रभाव, साताभर २८ अङ्क सुधार

सेयर

गृहपृष्ठ
सेयर

सेयर बजारमा अनशनको प्रभाव, साताभर २८ अङ्क सुधार

हरिप्रसाद शर्मा बिहीबार, मंसिर २७, २०७५

साताको पहिलो दिन आइतबारदेखि लगानीकर्ता नेपाल स्टक एक्सचेन्ज (नेप्से) भवनअगाडि अनशनरत छन् । समग्र पुँजी बजार सुधारको माग राख्दै उनीहरु रिले अनशनमा बसेका हुन् । लगानीकर्ता अनशन बसेको सातामा नेप्से २८ अङ्क बढेको छ । आइतबार ११२० अङ्कबाट कारोबार सुरु भएको नेप्से बिहीबार ११४८ अङ्क कायम भएको छ । सातामा आइतबार तथा सोमबार उत्साहजनक सुधार आएको थियो । जसको प्रत्यक्ष प्रभावमा नेप्से २८ अङ्कले बढेको हो । साताको अन्तिम दिन आज (बिहीबार) नेपाल स्टक एक्सचेन्ज (नेप्से) ७.६० अङ्कले बढेको छ । स्थिर अवस्थाबाट सुरु भएको सेयर बजार साढे दुई घण्टासम्म स्थिर थियो । त्यसपछि केही सुधार आउँदै बढ्न सुरु गरेको सेयर बजार ११५३ अङ्कको बिन्दुमा पुगेको थियो । लगत्तै ओरालो लागेको नेप्से ७ अङ्क बढेर ११४८ अङ्क कायम भएको हो । आज नेप्सेमा १ सय ५४ कम्पनीका ३ हजार २ सय ६६ कारोबारबाट ९ लाख ९७ हजार कित्ता सेयर खरिदबिक्री भई ३२ करोड ३७ लाख रुपैयाँको कारोबारे भएको छ । हिजो बुधबार नेप्सेमा १ सय ५६ कम्पनीका २ हजार ८ सय १७ कारोबारबाट ८ लाख ६५ हजार कित्ता सेयर खरिदबिक्री भई २६ करोड ८८ लाख रुपैयाँ बराबरको सेयर कारोबार भएको थियो । नेप्सेमा आज कारोबार भएका १० समूहमध्ये तीन समूह ओरालो लागेका छन् भने ७ समूहमा सुधार आएको छ । आज होटल, फाइनान्स र अन्यबाहेक सबै समूह बढेका छन् ।

प्रकाशित मिति: बिहीबार, मंसिर २७, २०७५ १५:२६

प्रतिक्रिया दिनुहोस्